هنعملك إعلان ويوصل لـ 50 ألف شخص !

  • تسويق

متخليهمش يضحكوا عليك بـ " هنعملك إعلان ويوصل لـ 50 ألف شخص ! .. العبرة مش بالعدد العبرة بمين هيتفاعل والـ 50 الف دول انت اصلا عاوزهم ولا لاء وهل هما من الجمهور المستهدف بتاعك ولا لاء !

ممكن يكون الـ reach الخاص بالاعلان اللى هيتعمل لك 10 ألاف شخص فقط ومع ذلك ييجى عائد كويس منه .. وممكن يكون أكثر ومفيش أى فائدة مرجوة منه !

العبرة مش بالرقم .. الموضوع بيتداخل فيه عوامل متعددة منها :-

1- المحتوى الخاص بالاعلان : بدأ إزاى ؟ بيتكلم عن إيه ؟ بيناقش ايه ؟ بيوجه كلامه لمين ؟ هل التوجيه ده صح ولا لاء ؟ .. هل المحتوى هيشد ولا لاء ؟ .. هل المحتوى فعلا مناسب وصحيح للفئة والجمهور اللى بتستهدفه ؟ .. هل هو طويل بشكل يتناسب مع طبيعة الحاجة اللى بتسوق لها ؟.. هل طول الكلام مضر ولا مفيد ؟ .. هل الاعلان فيه call to action اصلا ولا لاء ؟ واسئلة كتيرة جدا لازم تحطها فى الاعتبار .

2 - التصميم الخاص بالاعلان : .مش أى صور والسلام .. هل الصور مناسبة وتخلى اللى بيعمل scroll على الفيسبوك أو تويتر هيتوقف عندها ويشوفها .. هل فيه رسالة قوية او شعار مناسب إنت كاتبه بشكل يكون مميز للى هيشوفه ويشد إنتباهه .. هل ألوان التصميم مناسبة ؟ ايه طبيعة ونوعية الصور او التصميمات اللى انت مختارها .. هل هى نشاز او فيه افضل منها او متكافئة مع المحتوى اللى مكتوب ؟ .. وغيرها من اعتبارات بتحطها وانت بتشتغل ؟

3 - الاستهداف او ما يعرف بـ الـ target : هل إنت اخترت ودرست جمهورك صح .. هل عرفت هما مين ؟ عايشين فين " اعمارهم ايه ؟ حالتهم الاجتماعية ايه ؟ درجتهم العلمية الحالية ايه ؟ اهتمامتهم ايه ؟ أسلوب حياتهم ايه ؟ نشاطهم على السويشال ميديا بيدور فى ايه بالضبط وبيهتموا بايه فيها ؟

~ ايه هى الميزانية المناسب اللى ممكن تحطها فى الاعلان ده ؟
~ ايه هى الايام المناسبة اللى تشغل فيها اعلانك ؟
~ امتى توقف الاعلان ؟
~ ازاى تقيس نجاحك فى الاعلان ؟
 ~ إزاى تعرف ان لازم تزود فى الاعلان ده فى اليوم الفلانى او مع اى نتائج بالضبط ؟

~ عملت تارجت وكان مناسب جدا ومع ذلك مجابش معاك نتائج فتبدأ تحلل وتشوف هل المشكلة فى التصميم ولا المحتوى ولا من القناة نفسها اللى بتشتغل عليها زى ماحصل مع الفيسبوك فى منتصف شهر 12 وخاصة كل فترة لما بيحصل تحديثات جديدة فى نظام الاعلانات فيه او عموما .

- كل اللى فوق ده لمحة من اللى بيحصل أثناء عمل الإعلان ! .. كل دى أسئلة بيبقى لها وقت ودراسة وتفكير وهموم وضغط ومسئولية .. مسئولية الشغل ومسئولية نجاح ومسئولية ان فيه إيدك فلوس ناس مينفعش تصرفها فى الأرض ولازم تراعى ربنا أولا ثم الناس دى انهم حاطين أمل فى شغلك إنه يبقى مورد دخل ونجاح لهم فى شغلهم خاصة فى الظروف الحالية !

فمتخليش كلام اللى بيقولك " هدخلك 30 الف شخص او 100 ألف شخص يشوفوك " يخدعك .. وبلاش تستسهل الأمر ده لأنها فعلا مش سهلة ومش بسيطة ومش أى حد يعملها على عكس الكلام اللى بيتقال ولو نجحت فى مرة او عشرات المرات فيه عشرات المرات غيرهم هيبقى فيهم فشل والعبرة بالدراسة والتجربة والفهم .