ازاى تكتب محتوى جيد : الجزء الأول

  • محتوى

 

الـ Content الصح محتاج خطوط رئيسية وأولويات لازم تراعيها وانت بتعمله .. لأنه مش أي كلام بيتكتب وخلاص ! 

علشان كدا هنبدأ سوا سلسلة سريعة من النصائح الخاصة بإستراتيچية كتابة " المحتوى " :-

1. ابدأ بمخطط واضح
 إنك تبدأ بمخطط وخطة ثابتة لشغلك هتساعدك إنك تغطي كافة إحتياجاتك وكمان هتوفر عليك الوقت وتوفر لك أرضية ثابتة تقدر تبدأ منها وتعتمد عليها.

فـ .. قبل كتابة أي Content لازم تجاوب على 3 أسئلة وتراعيهم كـ أساس في مخططك :
• إنت ليه بتعمل content أصلًا ؟!
• إيه نوع الـ content اللي انت محتاج له ؟
• إزاي نعمل الـ contentt علشان نحقق أهدافنا اللي احنا عاوزين نوصل لها ؟

◄ ليه بتعمل content .. علشان تبيع، علشان تخلي جمهور يكون متابع ليك، علشان تسوق لخدمة معينة، علشان تستقبل تفاعل معين.. إنت بقى ليه بتعمله تحديدًا وعاوز منه إيه ويوصل لك إيه ؟

◄ إيه نوع الـ content اللي انت محتاج له .. وهنا إنت بتدرس السوق أو الوَسَط اللي انت مستهدفه وبتشوف إيه أنسب شكل للتواصل مع الشرائح اللي انت عاوز توصل ليها ..
 هل الكلام " المكتوب " مناسب لهم فقط؟ وإيه طبيعته؟ واللهجة اللي بتتكلم بيها.. والتوجيه اللي انت بتمشي عليه في الكلام دا , ولا الصور مناسبة أكتر؟ ولا الفيديوهات؟ ولا التلاتة مع بعض بخطة معينة بتوقيتات معينة.

◄ إزاي تعمل الـ content اللي هيحقق هدفك .. بتدرس هنا بعناية مستمرة وببحث متواصل إيه أنسب الطرق اللي تعمل بيها المحتوى بتاعك ودي مرتبطة بتحديد نوع المحتوى بكل أشكاله..
 بتشوف إيه اللي بيتفاعل معاه الناس أكتر، بتشوف إيه أنسب طريقة بتحقق معاك نجاح، بتحاول تطور من نفسك وتعمل أفكار مميزة تساعدك على نجاحك.

* فـ إنك تحط الحاجات دي كـ بداية وأساس في " المخطط " اللي هتعمله..

◄◄ هتساعدك في تجهيز وبناء شغلك بشكل سليم وتساعدك على التركيز في الإجابة على الأسئلة المهمة اللي نجاح شغلك بيتوقف عليها